На Антарктикот е измерена највисока температура во историјата (ВИДЕО)
На Антарктикот е измерена највисоката температура во историјата, од 18,3 степени, со што претходниот рекорд од 2015 година е надминат за 0,8 степени, соопшти вчера Светската метеоролошка организација.
Највисоката температура на Антарктикот во историјата ја измери аргентинската истражувачка база „Есперанца“, а претходниот рекорд е забележан во март 2015 година, што значи дека загревањето на тој континент се случува побрзо од светскиот просек.
Базата има датотека со податоци уште од 1961 година.
„Есперанца“ рекордната температура ја измери на полуостров на Антарктикот што се протега кон Јужна Америка, и тоа е едно од местата што се загреваат најбрзо во светот, пренесува Гардијан.
Според податоците на Светската метеоролошка организација, оваа локација во изминатите 50 години се загреала за речиси три степени, па скоро сите глечери се топат.
Научниците предупредуваат дека глобалното загревање предизвикува топење на толкави количества мраз на Антарктикот што огромната плоча мраз е на пат да се распадне.