Денеска од 19.00 часот екипата на МЗТ Скопје ќе го одигра и третиот натпревар од АБА2 лигата на домашен терен во СЦ „Јане Сандански“ против Рогашка од Словенија.

Моментно на табелата води аеродромскиот клуб со максимални две победи, а Рогашка има учинок од еден триумф и пораз на четвртото место.

– Рогашка летово формира сериозен тим со многу искусни кошаркари. Ангажираа двајца плејмејкери од Приморска, имаат добар Американец на центарската позиција и на првите две средби покажаа дека сигурно ќе бидат меѓу екипите кои ќе се борт за самиот врв во АБА2, која сезонава е далеку поизрамнета. На нас е да одиграме максимално, да бидеме борбени и пожртвувани и доколку го направиме тоа, тогаш ќе може да се надеваме на позитивен исход – се зборовите на Кочов.

Играчот на „штрковите“ Ранко Мамузиќ вели дека пред македонскиот кошаркарски шампион е најголемиот предизвик во досегашниот дел од сезоната.

– Противник со највисоки амбиции сезонава во АБА2. Почетокот на домашното првенство само дополнително нè оптовари, но и покрај тоа мислам дека сме добро подготвени за овој дуел. Доколку ги послушаме советите и насоките од тренерит, тогаш ќе може да дојдеме до тоа што сите го посакуваме – рече Мамузиќ.

АБА2 лига
3. коло (двојки) –

Вторник
МЗТ Скопје Аеродром-Рогашка (19.00 часот)

Среда
Борац-Спарс (18.00)
Хелиос Санс-Нови Пазар (18.00)
Сутјеска-Слобода (19.00)
Сплит-Ловќен (19.00)
Широки-Динамик ВИП ПЕЈ (19.00)