МЗТ Скопје во финалето на АБА 2 лигата
Екипата на МЗТ Скопје се пласира во финалето на АБА 2 лигата откако и во реваншот пред своите гледачи беше поуспешна од Спарс. „Металците„ не дозволија драматичен исход како во првиот дуел одигран во Сараево (71:70) и со одлична игра на двата дела од кошаркарскиот терен остварија убедлива победа од 84:70.
Уште од самиот почеток кошаркарите на МЗТ Скопје тргнаа фуриозно поведувајќи со 11:2 покажувајќи му на противникот дека не треба да се надева на изненадување. Со несебична и колективна игра во нападот и фанатична борбеност во одбраната, кошаркарите на МЗТ Скопје го контролираа резултатот. Константната предност од 10-тина поени пред полувремето се намали на четири поени (41:36) поради падот на концентрацијата и двете тројки во серија на противникот.
Сепак, дилемите околу победникот беа решени уште на стартот од третата четвртина кога со серијата од 8:0, македонскиот тим направи предност од 12 поени (49:37) и до крајот не ја испушти високата предност.
Најефикасен во редовите на МЗТ Скопје беше Иве Иванов со 24 поени и 8 скокови, додека Дамјан Стојановски имаше скор од 19 поени и три скока. Јунакот од првиот дуел, Лестер Медфорд даде 14 поени и имаше дури девет асистенции.
Противникот на МЗТ Скопје во финалето на АБА 2 лигата ќе биде подобриот од втората полуфинална пресметка помеѓу Приморска и Борац Чачак, во која предност од 1:0 во победи има словенечкиот тим.