МЗТ Скопје после голема борба поразен од Игокеа
Кошаркарите на МЗТ Скопје вечерва беа поразени на гости кај Игокеа со 96:90 во деветтото коло од АБА лигата.
Во текот на целиот натпревар МЗТ беше во подредена улога, сепак до крајот успеаа да дојдат до егал, но не и да го изненадат тимот кој од клупата го води поранешниот селектор на Македонија, Драган Бајиќ.
Од самиот старт Игокеа се направи предност и го отвори натпреварот со 11:5. До полувремето тимот од Босна дојде и до двоцифрена предност со која замина на полувреме (56:47).
Добро отвори МЗТ во второто полувреме и се врати на два поени негатива, а тогаш повторно следуваше подобар период за Игокеа. Не се откажуваше МЗТ и повторно се врати само на минус два. Во финишот гледавме егал натпревар каде што сепак Игокеа со неколку реализирани напади го одлучи прашањето на победникот.
Фантастичен натпревар одигра Кендрик Реј со 37 постигнати поени, додека кај МЗТ Мајк Кефи го заврши мечот со 21 поен.