МЗТ Скопје „преживеа“ Кожув
МЗТ Скопје ја задржа лидерската позиција на табелата во Суперлигата и по шестото коло, откако успеа да слави над Кожув и тоа по продолжението од пет минути. Иако во минатото коло го декласира актуелниот шампион Работнички со 22 поени разлика, за триумф над петтопласираниот во Суперлигата, Кожув му беа потребни дополнителни пет минути за да слави со 89:88.
„Металците“ прво во регуларниот дел успеаја да се спасат од пораз, благодарение на поенот од слободно фрлање на Вудард, а во продолжението, капитенот Дамјан Стојановски со тројката во последните моменти успеа да донесе триумф на својот тим од минимални 89:88.
Токму Стојановски со 22 поени беше најдобар во редовите на МЗТ Скопје, додека 16 поени постигна Вудард. Кај Кожув се истакна Кесар со 20 поени и 11 скокови.
Екипата на Работнички, брзо се рехабилитираше од поразот од МЗТ Скопје и со 97:71 го совлада Куманово. Сите дилеми околу победникот беа решени во првата четвртина која Работнички ја доби со 24:12 и до крајот на натпреварот само го зголемуваше водството.
Бобан Стајиќ со 24 поени беше најпрецизен во редовите на Работнички, додека во редовите на Куманово, најпрецизен беше Ѓекич со 20 поени.