МЗТ им се врати на победите во АБА2 лигата
Во последниот натпревар од регуларниот дел МЗТ Скопје Аеродром мораше со пресврт во последната четвртина да дојде до 13. победа сезонава.
Македонскиот кошаркарски шампион ја прекина негативната серија од пет порази по ред во АБА2 лигата, откако денеска пред празните трибини (поради коронавирусот) во СЦ „Јане Сандански“ триумфираше над Ловќен Цетиње со 75:74 (27:22, 14:20, 18:23, 16:9).
Во последниот натпревар од регуларниот дел МЗТ Скопје Аеродром мораше со пресврт во последната четвртина да дојде до 13. победа сезонава.
Во самиот финиш од средбата противникот можеше со целиот „плен“ да си замине од ова гостување, но Поповиќ на две секунди до крајот не реализираше шут за три поени.
За „металците“ доминираше Стојановски со 17 поени (седум скока, четири асистенции), по 15 поени имаа Милошевиќ (осум скока, шест асистенции) и Магдевски (по четири скока и асистенции, но и пет загубени топки).
На спротивната страна за црногорскиот претставник по 13 поени запишаа Врбица (четири скока) и Поповиќ (седум скока).
Играчите предводени од тренерот Ѓорѓи Кочов и сезонава ќе играат во полуфиналниот плеј-оф за учество во првата АБА лига. Според најавите, полуфиналните двојки се Борац-Сутјеска и Сплит-МЗТ Скопје Аеродром.
На конечната табела во регуларниот дел Борац (Србија) го освои првото место со 42 бодови, пред Сплит (Хрватска) и МЗТ Скопје Аеродром по 35 , а на четвртата позиција заврши црногорската Сутјеска (34).