Во пожарот што денеска изутрина избувна на првиот кат во зградата на поранешна Комерцијална банка, каде се сместени просториите на Државниот инспекторат за животна средина, нема повредени лица, а според првичните информации добиени од Инспекторатот, причинета е материјална штета во три нивни канцеларии, соопшти Министерство за животна средина и просторно планирање (МЖСПП).

Храбрите пожарникари ја смирија огнената стихија кај Секретаријатот (ФОТО)

Според МЖСПП, на истиот спрат се наоѓаат канцелариите на Одделението за комуникација со јавност при Министерството за животна средина и просторно планирање.

-Во моментот на избувнување на пожарот, пред 07.00 часот, ниту еден од вработените не бил присутен во тие канцеларии. За утврдување на евентуална материјална штета во овие простории, ќе се формира комисија во рамки на Министерството. Во тек е увидот од страна на Министерството за внатрешни работи, со кој ќе се утврди причината за пожарот, наведува МЖСПП.

Инспекторат за животна средина: Архивата е оштетена во пожарот, но сите документи ги има во електронска евиденција

Пожарот во зградата на поранешна Комерцијална банка каде се сместени повеќе државни институции, како и МИА, избувна утринава околу 06:50 часот, а беше изгаснат во 08:50 часот. Интервенираа 24 пожарникари со девет возила.