Синоќа во 22 часот од страна на полициски службеници од полициската станица Гази Баба биле уапсени В.М.(19) од Арачиново, С.Р. (21) од селото Сингелиќ и 33-годишниот В.В. кој живее на улицата Алија Авдовиќ“. Тројцата се приведени поради основано сомнение за непочитување на ограничувањето на движење, велат од МВР за „Слободен печат“.

– Лицата биле уапсени на улицата „Алија Авдовикќ“. По апсењето се собрала поголема група која излегла на улица во знак на протест. По изготвената документација, тројцата уапсени лица се пуштени од полициска станица, а насобраната толпа се разотишла. Ќе бидат преземени соодветни мерки и против останатите лица што не го почитувале ограничувањето на движење – велат од МВР.

Поголема група граѓани синоќа во скопската населба Ченто се собра на протести откако полицијата за време на полицискиот час уапсила три лица.

Лицата беа уапсени бидејќи не ја почитувале забраната за движење која важи на целата територија на земјава од 16 часот со 5 часот наутро. Во знак на револт, нивни сограѓани излегоа на протест.  Според жителите на Ченто, приведените граѓани играле карти во двор.

На протестот се појави и градоначалникот на Гази Баба, Борис Георгиевски за да ги смири насобраните граѓани.