Доколку не се почитува одлуката на Влада донесена на синоќешната седница за забрана за собирање во групи од пет и повеќе лица, припадниците на МВР ќе преземат мерки за растурање на групата со предупредување, а ќе се преземат и мерки согласно Законот за јавен ред и мир, порача на денешната прес-конференција министерот за внатрешни работи Наќе Чулев.

Во однос на тоа дали МВР размислува за воведување кризна состојба на поширокото подрачје на Скопје, министерот Чулев рече дека засега не се размислува во таа насока и оти тоа е одлука што треба да ја донесе Владата.

Тој посочи дека можеби во наредниот период ќе се преземат поригорозни мерки со цел ограничување на движењето на луѓето.

Чулев информира дека секторите за внатрешни работи прават контрола на лицата кои имаат издадено решенија за здравствен надзор два пати дневно со полициски патроли.

Во однос на тоа дали има потреба да се активира резервниот полициски состав, министерот потенцира дека МВР врши анализа во однос на потребите за ангажирање на резервниот полициски состав, но оти засега нивното ангажирање не е неопходно.