Кумановското дуо „Ред-тејлд хилер“ (Red-Tailed Healer), кое се појави на домашната и на интернационалната сцена со своите сингл-изданија „Resilience“ и „Openness“, го издаде и својот трет сингл насловен „The Noria“.

– Нашата нова песна претставува поетска илустрација на несреќите и хендикепот на луѓето кои се раѓаат и растат во неразвиени држави, нивните аспирации и нивната надеж, како и нивната генерална огорченост и тенденција да се спротивставуваат на системските норми наметнати од новото, модерно хипер-општество – објаснуваат од бендот.

Бендот „Ред-тејлд хилер“ (или „Исцелителот со црвени перја“) со своето прво издание „Openness“ се појави во август 2020-та како оригинална идеја на Дамјан Милановски – Данска, музички ентузијаст и гитарист на поранешниот кумановски метал состав „Вандал“. Заедно со младата и талентирана пејачка и актерка, Ивана Стефановска, подоцна го издаваат и нивното второ издание „Resilience“, кое беше пласирано на интернационалната сцена преку дигиталната музичка платформа „Спотифај“.

– Наше задоволство е да создаваме стимулирачка музика, која инспирира и го слави внатрешниот трансформативен процес на поединецот во модерното општество. Веруваме дека младите луѓе во целиот свет и младите во Македонија знаат за нешто подобро од секојдневно-сервираниот медиокритет на полето на уметноста. Се надеваме дека нашите сизифовски напори ќе разбудат искра и желба кај младите да почнат да творат за тоа што е вистинито и со доза на одговорност да создаваат уметност со безвременски квалитет – потенцираат од бендот „Ред-тејлд хилер“.

(Текстот е објавен во „Културен печат“ број 67, во печатеното издание на „Слободен печат“ на 6-7 февруари 2021)