Жозе Мурињо уште еднаш го направи тоа во што е меѓу најдобрите, да го совлада фаворизираниот противник кога највеќе е потребно. Тотенхем до победата дојде во второто полувреме кога за осум минути постигнаа два гола и ги решија дилемите околу победникот.

Зимското засилување Стивен Бергвајн во дебитантскиот настап во дресот на Тотенхем успеа да постигне гол, тој го отвори резултатот во 63. минута, а победата и трите бодови ги обезбеди Сон во 71. минута.

Работата на Тотенхем му ја олесни Олександр Зинченко кој беше исклучен во 60. минута.  Резултатот можеше да биде поинаков доколку Илкај Гундоган во првото полувреме го реализираше пеналот.

Со победата Тотенхем се искачи на петтото место на табелата и дојде на само четири бодови од Челси, а истовремено му направи голема услуга на Ливерпул кој од ден во ден е се поблизу до титулата. „Црвените“ сега имаат 73 бодови, дури 22 повеќе од второпласираниот Манчестер сити на 13 кола до крајот на сезоната.

Во првиот натпревар денеска, Арсенал продолжи со ремијата, овој пат одигра без голови на гостувањето кај Барнли.