Сè започна со тој пораз од Тотенхем, Жозе Мурињо го победи Гвардиола и славеше со резултат 2:0, на 21 ноември пред точно три месеци.

Комплетно се промени Гвардиола после тој пораз, како и Манчестер сити, од тој момент екипата започна да го игра можеби најдобриот фудбал од доаѓањето на Шпанецот.

Потоа започнува шоуто – 27 натпревари, 24 победи (20 по ред кои сè уште траат), 19 пати зачувана мрежа и само осум примени голови.

Во ноември сите ги „отпишаа граѓаните“ во трката за титулата сезонава, а сега сите други се надвор од истата, бидејќи клубот од Етихад има дури 13 бода повеќе од градскиот ривал Манчестер јунајтед и Лестер, кои имаат еден натпревар помалку. Интересно, по поразот од Тотенхем, Сити заостануваше четири бода зад Ливерпул, сега има 22 повеќе од „црвените“.

Што се однесува до другите натпреварувања, во Лигата на шампионите, Сити го победи Менхенгладбах на првиот дуел со резултат 2:0 и со една нога е во четвртфиналето. Во ФА купот, Сити е домаќин на Евертон, исто така во четвртфиналето, додека на 25 април го игра финалето во Лига купот, токму против Тотенхем на Мурињо.

Сити е во игра на сите четири фронта и се чини дека ова е година кога ќе ги нападнат сите трофеи.