Мургоска-Станимировиќ: Благ пораст на новозаразени, „британскиот сој” не е за паника туку за придржување на мерките
Зголемен е бројот на тестирања и позитивни случаи во Прилеп, но не се очекува нов пик. Причини се „британскиот сој” на вирусот што брзо се шири, но и непочитувањето на мерките и групирањата на граѓаните. Нема место за паника, констатираат од прилепскиот Центар за јавно здравје. Се контролираат кластерите. Има фамилијарни, но не и во работните средини.
Според епидемиологот од Центарот за јавно здравје, Тања Мургоска Станимировиќ, новиот „британски сој” на вирусот застапен кај десет регистрирани пациенти е предупредување за почитување на мерките, ама симптомите се исти. Тројцата хоспитализирани пациенти се со средна клиничка слика. Нема податоци дека заболените патувале во странство, туку инфекцијата е од земјава.
-Од крајот на декември бележевме тренд на намалување на позитивни случаи. Ако во декември имавме регистрирано 1158 заболени, во јануари бројот беше 322-ца заболени, а досега во февруари се 112 новозаболени. Последнава недела бележиме пораст на тестирањата, бројот на лицата кои бараат, закажуваат тестирање и напоредно, бројот на позитивните резултати. Последниве неколку дена повторно регистрираме двоцифрени бројки, вчера 31, а денеска бројот ќе биде околу 30, со што има неколку случаи во Крушево и Македонски Брод. Појавата на новиот „британски сој” на коронавирусот не треба да биде причина за паника и за загриженост. Се знае дека вирусот побрзо се шири, но нема научни докази дека е поопасен од претходните негови варијанти, односно соеви, додава Станимировиќ.
Таа појаснува дека тројцата хоспитализирани од 10-те регистрирани од „британскиот сој” не се со тешка, туку со средна клиничка слика.
–Од епидемиолошките анкети кои ги добиваме, присутни се истите симптоми. Зголемувањето на позитивните случаи секако дека делумно се должи и на побрзото ширење на новиот сој на вирусот, а другото се должи на непочитувањето на мерките, зашто од епидемиолошките податоци што ги добиваме, новозаразените се инфицирани по семејни средби, прослави. И сами сме сведоци на нивното однесување во угостителските објекти. Во моментов може да ги следиме кластерите, фамилијарни се, се уште нема во работните организациии каде се применувата мерките, објаснува Станимировиќ.
Во земјава, со испитувањата на МАНУ, се утврдени 20 мутации на вирусот. Последната мутација е британската. Според Мургоска Станимировиќ, колективен имунитет може да се стекне со вакцината и со строго придржување на заштитните мерки.
Инаку, од преку 4 675 случаи во Прилеп од почетокот на пандемијата се регистрирани само четири случаи на реинфицираност со вирусот. Сето зависи од индивидуалниот имунитет.
-Иако е мала бројката, сепак, велиме дека сите, и тие што прележале, мора и понатаму да ги почитуваат мерките за заштита. Се уште не се знае колку трае тој стекнат имунитет, но со текот на времето тој се намалува. Случаите на реинфицирање се јавувата по најмалку три месеца, но сето зависи од индивидуалниот имунитет, вели Мургоска Станимировиќ.
Во Прилеп сега се активни 179 случаи, 22-ца се хоспитализирани. Од почетокот на пандемијата починале 240 лица.