Секое поскапување на цените на нафтата, „откинува“ дел од заработувачката на превозниците, вели за „Слободен печат“ Биљана Муратовска. Таа објаснува дека во моментот е голема понудата на камионски транспортери, а побарувачката сè уште не е на нивото од пред пандемијата, па ако сакаат да работат, превозниците не смеат да ги покачуваат цените. Секое поскапување е директен удар врз заработувачката на превозниците, а тие немаат голем маневарски простор, децидна е Муратовска.

– Цените на превозот ги диктираат светските увозно-извозни компании и тие на берзите наоѓаат поевтини возила, а заработувачката оди за нив. Во моментот сè уште нема рамнотежа меѓу понудата и побарувачката, бидејќи европската и светската економија не работат со полн капацитет, па така има поголема понуда за транспорт, отколку понуда на стока што треба да се превезе – додава Муратовска.

Транспортерите се загрижени за ситуацијата со поскапувањето на нафтените деривати, но и на природниот гас и на другите енергенси, бидејќи тоа веќе има свое влијание врз инфлацијата.

– Време е Владата да преземе некои чекори, па ако треба и да ги замрзне цените на дериватите, бидејќи се заканува голема криза – вели Муратовска.

Берзанските информации говорат дека во понеделникот акциите на американската сурова нафта WTI го зголемија нивото на цената од 80 долари, највисоко од 2014 година.