МТСП: Надоместот за попреченост од наредната година ќе се покачи за 15 проценти

фото Архива

Министерството за труд и социјална политика во врска со најавениот  протест на Коалицијата „Менуваме” вели дека министерството интензивно работи на унапредување на инклузијата на лицата со попреченост во нашата држава и најави зголемување на паричниот надомест за оваа група граѓани за 15 проценти од следната година.

Потврда за унапредување на инклузијата на лицата со попреченост, според МТСП, е и постојаното проширување на мрежата на дневни центри за децата со попреченост.

-Неодамна МТСП го отвори дневниот центар за лицата со попреченост во Липково, а во тек е и изградба на центри за деца со попреченост и во општините Делчево, Чашка, Боговиње и во Скопје. МТСП веќе информираше дека минатата недела склучи и два нови договори за соработка со општините Карпош и Тетово, со поддршка на Светска Банка, за отворање на дневни центри за деца со попреченост. Овие два центри преку стручните тимови ќе обезбедуваат индивидуални и групни третмани, според претходна процена на потребите на вкупно 62 деца со попреченост, велат од МТСП.

Оттаму потенцираат дека целосната и доследната имплементација на Конвенцијата за правата на лицата со попреченост на ОН е политика на која МТСП и министерката Јагода Шахпаска работат интензивно.

-Но, тоа е процес кој не може да се заврши за неколку месеци, туку се потребни системски и одржливи решенија, особено ако претходно немало никаков напредок на ова поле. Министерката Шахпаска неодамна одржа средба со претставници на Коалицијата „Менуваме” и информираше дека сите нивни барања во основа се дел од агендата на Министерството. Во однос на барањето за зголемување на надоместокот заради попреченост, министерката Шахпаска укажа дека е предвидено покачување на износот за најмалку 15 проценти. Поради пандемијата со Ковид-19 неговата реализација беше пролонгирана за наредната година, велат од МТСП.

Во делот на зголемување на инклузијата и независноста на лицата со попреченост, МТСП информира дека заедно со Националниот сојуз на слепи лица и УНДП неодамна го пуштиле во употреба и аудио читачот-апликација за лица со оштетен вид, кој овозможува олеснет пристап до информации, независност во движењето и завршувањето на секојдневните обврски.

 

Видео на денот