МСУ: Теоретичари и експерти онлајн зборуваат на тема „Без/редие во светот на уметноста“
Музејот на современата уметност (МСУ) во Скопје во рамките на интердисциплинарната програма почна со онлајн предавања на тема „Без/редие во светот на уметноста“. Предавачи на темата се водечки автори, теоретичари и експерти, како Сантијаго Забала, професор на Универзитетот „Помпеу Фабра“ во Барселона, кој предавањето го одржа на 29 октомври, Шантал Муф, професорка на Вестминстер Универзитетот во Лондон и воедно водечка политичка теоретичарка, која предавањето ќе го одржи на 14 ноември, Ејал Вајзман, професор на Универзитетот Голдсмитс во Лондон и основач на колективот „Форензичка архитектура“ (25 ноември), Кети Чукров, професорка на Универзитетот за хуманистички науки во Москва (10 декември) и Џеф Диаманти предавач на Универзитетот во Амстердам (17 декември).
Сите предавања се одржуваат преку платформата Зум, а можат да се следат преку веб и ФБ-страницата на МСУ. Автор на програмата е Тихомир Топузовски, раководител на интердисциплинарната програма во МСУ и главен и одговорен уредник на списанието „Големото стакло“. Основните определби на програма се да претставува и промовира современи критички форми на знаење, методологии за истражување, како и анализи и разбирање на уметничките и културните практики.
– Циклусот предавања именуван „Без/редие во светот на уметноста“ е инициран од „без/редието“ на конкретните ситуации и кризи, како бегалската криза, пандемијата, еколошките предизвици и климатските промени, општествените поделби, антагонизми и исклучувањето на групи и на поединци од економска активност и нивното политичко учество. Ова без/редие на светот кој го познаваме се рефлектира на самиот „свет на уметноста“ институционално поставен во динамиката на економскиот и политичкиот поредок. Оттаму, оваа иницијатива ја адресира важноста да се дискутира на актуелните теми и предизвици, како и да се промовираат серија теоретски пристапи и емпириски анализи за разбирање на културните и уметничките практики во постојните контексти – објасни Топузовски.
(Текстот е објавен во „Културен печат“ број 56, во печатеното издание на „Слободен печат“ на 14-15 ноември 2020)