Можно е Германија денеска да се збогува со шансите за нокаут-фаза на СП
После шокантниот пораз на стартот од групата „Е“ од Јапонија, репрезентацијата на Германија не смее да си дозволи нов пораз на Светското првенство во Катар.
Следен ривал е селекцијата на Шпанија која започна фуриозно со триумф од 7:0 над Костарика.
Германците, кои според многумина треба да бидат меѓу фаворитите за титулата, можно е уште во групната фаза да се збогуваат со шансите за осминафинале, и тоа доколку загубат од Шпанија, а Јапонија триумфира или ремизира со Костарика.
Од 11.00 часот е натпреварот помеѓу Јапонија и Костарика, а дербито на денот Шпанија – Германија е од 20.00 часот.
До сега на светските првенства Шпанија и Германија четири пати се сретнале, на СП 1966 тогашна Западна Германија славеше со 2:1, потоа со истиот резултат на СП 1982 германските фудбалери исто така беа подобри. На СП 1994 немаше победник (1:1), а Шпанците единствената победа ја имаат на СП 2010 со резултат 1:0.