Можен ли е пресврт и Роналдо место во Сити да се врати во Јунајтед
Заминувањето на Кристијано Роналдо од Торино е главна вест во Манчестер, градот во кој од 2003 до 2009 година настапуваше за Јунајтед.
Но, сега со Роналдо не се поврзува неговиот поранешен тим, туку лутиот градски ривал, Манчестер сити и медиумите тврдат дека Португалецот веќе ги договорил личните услови со „граѓаните“.
Но, ниту во „црвениот“ дел од Манчестер не губат надеж бидејќи на „Олд трафорд“ настапува колегата на Роналдо од португалската репрезентација, Бруно Фернандеш и тие двајца се во постојан контакт. Тоа го потврди и менаџерот на Јунајтед, Оле Гунар Солскјер.
– Отсекогаш сме имале добра комуникација. Бруно исто така разговара со Кристијано и знае што мислиме за него. Доколку се одлучи да го напушти Јувентус,знае каде се наоѓаме. Роналдо е најдобар фудбалер во историјата на Јунајтед доколку ме прашувате мене. Имав среќа да играм со него, но и да го тренирам на почетокот од кариерата. Ќе видиме што ќе се случува – изјави Солскјер.
Во исто време се појавија информации дека шансите за Роналдо да се врати на „Олд трафорд“ се големи, и тоа исто така го пренесе новинарот чија специјалност се трансферите, Фабрицио Романо.