„Може да се случи голема експлозија среде Европа“: Лавров вели дека на Косово состојбата е алармантна
„Ситуацијата на Косово е алармантна, може да се случи голема експлозија во центарот на Европа“, изјави рускиот министер за надворешни работи Сергеј Лавров за новинарите во Кенија.
-Тие ги прекршија сите принципи на Хелсиншката повелба и другите документи на ОБСЕ. Ситуацијата е алармантна, но Западот тргна по патот на тоталното потчинување на секој кој на кој било начин го изразува своето мислење, нагласи Лавров, пренесува РТС.
Голем број припадници на КФОР со опрема за разбивање демонстрации од утрово беа распоредени во близина на општинските згради во Звечан, Лепосавиќ и Зубин Поток, на северот на Косово, каде се собраа жители од српска националност. Според КФОР, Србите неиспровоцирани ги нападнале војниците, кои одговориле на нападите со гумени куршуми и шок бомби. Повредени се 25 припадници на КФОР.
Од друга страна, српските медиуми од Косово јавија за најмалку 50 повредени граѓани, меѓу кои еден се бори за живот, како и дека дел од нив не се погодени со гумени куршуми, туку имаат рани од боева муниција, односно од огнено оружје.
Меѓународната заедница, САД и ЕУ, порачаа веднаш да запрат насилствата и да се смират тензиите во Косово.