Може да продолжи изградбата на штипската клиничка болница, штипски „Бетон“ и грчки „Интракат“ се договорија

Новата штипска болница се гради со години/Фото: МИА

Штипски „Бетон” и грчки „Интракат” направија вонсудски договор и го откочија проектот за изградба на новата Клиничка болница во Штип. На денешната прес-конференција градоначалникот на Општина Штип, Иван Јорданов и директорот на Градежната компанија „Бетон”-Штип, Ванчо Мијалчев истакнаа дека подизведувачот „Бетон” по тригодишниот судски спор се откажа од каматите и прифати долгот да се исплати на рати. Ова според  Мијалчев, е со цел регионов да го добие долгоочекуваниот објект, кој е од голема важност за сите.

-Ние, веќе три години водиме спор за да ги наплатиме нашите побарувања кои се врз основа на сработеното на Клиничка болница – Штип. Во изминатиот пат многу пати бевме спомнувани како причина зошто не се гради болницата, што беа на некој начин шпекулации. Со медијаторство на градоначалникот на Штип, кој единствено ја разбра проблематиката на оваа болница, дека е во интерес на целиот регион, а не се работи за гола политика. Ние како Бетон – Штип направивме свој потег, прифативме вонсудски да се спогодиме, да се откажеме од каматите, да прифатиме да се плати долгот на рати и да дадеме шанса изведувачот „Интракат” да не отиде во стечај со надлежните институции да го завршат конечно, вели Милајчев.

Постигнатиот договор значи излегување на „Бетон” од стечај и деблокирање на сметка, а со тоа се дава и втора шанса за новата Клиничка болница во Штип.

-Прво, ние ќе си ги наплатиме парите согласно со планот за да можеме да ги сервисираме доверителите на Бетон – Штип, бидејќи излезе од стечај. Тоа е првиот момент, а вториот е тоа што ја деблокиравме сметката и дадовме шанса проектот за се заврши, додава Мијалчев.

Медијатор за разрешување на проблемот беше штипскиот градоначалник, кој вели дека разговорите со „Бетон” се воделе веќе извесно време. Благодарение на тие разговори компанијата направила отстапка, па со ова се отклонети сите пречки. Јорданов очекува ресорното Министерство да ги одвои финансиските средства и да се продолжи со изградбата.

-Во изминатиот период имавме интензивна комуникација за решавање на овој проблем со којшто се затечени не само граѓаните на Штип, туку и жителите на Источна Македонија. Од суштинско прашање беше да се отклони првата пречка за продолжување на изградбата. Како градоначалник, и покрај тоа што не е моја надлежност, комуницирав за ова да се реши, вели Јорданов.

Договорот е активен и нема никаква пречка работата да продолжи уште веднаш, вели директорот на „Бетон”. Остатокот останува на Министерството, односно тие треба да ги исплатат финансиските средства на изведувачот ако досега го немаат сторено тоа. Понатаму со изградбата би се продолжило согласно со утврдената динамика во планот усвоен од надзорниот инженер.

Инаку МИА, минатата недела, објави дека новата Клиничка болница е изградена 40 проценти, а од Министерството за здравство истакнаа дека изградбата на првата фаза од болницата е до декември 2022 година.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот