Турскиот претседател Реџеп Таип Ердоган денеска изјави дека е можно Турција да донесе одлука за членство на Финска во НАТО, што, пак, може да ја „потресе“ Шведска.

„Доколку е потребно, можеме да испратиме уште еден одговор за Финска. Шведска ќе биде шокирана кога ќе дадеме поинаков одговор за Финска“, рече Ердоган на средбата со млади во турскиот град Билеџик.

На 18 мај лани, Финска и Шведска ги доставија своите барања за прием во Алијансата до генералниот секретар на НАТО. Досега тие се ратификувани од 28 земји-членки, а единствено Турција и Унгарија не го сториле тоа.

Министерот за надворешни работи на Шведска, Тобијас Билстрем, пред два дена изјави дека поради палењето на Куранот во Стокхолм, процесот за влез во НАТО е прекинат, но изјави дека се надева оти договор со Анкара ќе биде постигнат на самит на министрите за надворешни работи на членките на НАТО, кој се одржува во јули Вилнус.

Претходно шефот на финската дипломатија Пека Хависто изјави дека е можно постапката за ратификација на барањето на земјата за членство во Северноатлантската алијанса да продолжи одвоено од Шведска, но тој подоцна ја повлече таа изјава.