Мост во Тузла ќе го носи името на Ѓорѓе Балашевиќ
Мост во Тузла го доби името на Ѓорѓе Балашевиќ, само неколку дена откако легендарниот музичар почина на 68-годишна возраст.
Иницијативата на Синан Алиќ, претседател на Фондацијата „Истина, правда, помирење“ од Тузла да се именува улица или површина по Балашевиќ, денес го доби својот епилог, пишува „Dnevni avaz“.
„Мојата иницијатива беше поддржана од многу луѓе, а Саед Башиќ предложи мостот што ги поврзува Градскиот парк и Панонското езеро да го носи името Ѓорѓе Балашевиќ“, вели Алиќ.
Меѓутоа, за мостот да биде официјално именуван по Балашевиќ, потребна е согласност од Градскиот совет, што е постапка што може да трае со месеци.
„Ќе се усвои. Ѓорѓе Балашевиќ ги поврзуваше луѓето како и овој мост. Ова е благородна идеја“, вели Екрем Хаџиќ Сосо, музичар од Тузла.
Плакетата со натпис „Мост на панонскиот морнар – Ѓорѓе Балашевиќ“, беше откриена од две девојчиња, а насобраните граѓани го поздравија овој потег.