Моралес: Барди има одлична сезона, сакам да остане во Леванте!
Веднаш после победата од 4:2 над Бетис во која придонесе македонскиот репрезентативец со еден гол, шпанските медиуми објавија информација дека премиерлигашкиот гигант Арсенал испрати понуда за Енис Барди.
Нашиот интернационалец покажува добри и сезонана, и повторно го привлекува вниманието на поголемите клубови. Сезонава во „Ла Лига“ има четири голови и две асистенции, и интересен е податокот што кога Барди реализира погодок, тимот никогаш не губи. Тој има договор со екипата до 30 јуни 2022 година.
За таквата понуда од „топчиите“ слушна и капитенот на Леванте, Хосе Моралес кој изрази желба да остане Барди во составот од Валенсија.
– Разбирам дека Барди, Кампања и Аитор би можеле да си заминат, бидејќи сите тројца имаат одлична сезона и придонесуваат за тимот. Како капитен сакам да останат сите во клубот. Тие се важни играчи, би било навистина штета доколку ги загубиме. Кога перформансите на играчите се подобруваат, нормално е клубовите кои се на повисоко ниво да покажуваат интерес за нив – рече Моралес за „Марка“.