Иднината на трките на легендарната патека „Монца“ е обезбедена пред да се одржи трката за оваа сезона. Сезонава Монца прославува 90 години од старт на авто мото трките, а организаторите потпишаа петгодишен договор со сопствениците на Формула 1, Ливерти медиа груп.

Досега на Монца се возени дури 68 трки во Ф1 шампионатот, што е повеќе од било која друга патека. Единствено Италија и Велика Британија се домаќини на трките во Формула 1 од првиот шампионат во 1950 година.

Оттогаш, само во 1980 година трката за Големата награда на Италија не се возеше во Монца, туку се одржа на патеката „Енцо и Дино Ферари“ во Имола. Првата трка за Големата награда на Италија е возена уште во далечната 1921 година.

– Историјата, брзината и страста се зборовите со кои љубителите на автомобилизмот ги поврзуваат со Монца. Чувството кое го имаат и возачите, и навивачите е единствено – изјави Чејс Кери, извршниот директор на Формула 1.