На денешната прес-конференција во Кафе бар „Цреша“, добропознатиот македонски бенд „Фолтин“ го промовираше својот 8. албум „Момома“. Како што најавуваат од бендот, „Момома“ е најзрелиот албум што го имаат направено.

– Би кажал дека „Момома“ е збирка од шест постандардни песни од она на што сме навикнати сите и тоа за нас претставува еден своевиден експеримент. Очекувањата се и позитивни и негативни, нормално. Во продукцијата не вложивме многу пари, ама вложивме енергија, чувства, срце и душа – изјави пејачот на бендот, Бранислав Николов.

Исто така тој дополни дека новиот албум го сметаат за збирка на песни за фестивал, ако се свирени од еден колектив како еден човек и додаде дека е многу попитом и поемотивен од претходните албуми.

– Турнеја договараме некаде во втората половина во јуни, а промотивниот концерт ќе биде во текот на мај – одговори пејачот Бранислав на прашањето кога може публиката да очекува нивни настап.

Групата „Фолтин“ е формирана во 1997 година и ја сочинуваат Бранислав Николов – глас, Пеце Трајковски – гитара и сајзер, Гоце Јовановски – бас, Славчо Јовев – тапани и Пеце Николовски – кларинет и усна хармоника. Како гости на новиот албум се Петар Димитровски – клавијатури, Владан Дробицки – тромбон и Васко Бојаџиски – саксофон.