Момче од Демир Капија на возраст од 27 години и 32 годишен пациент од Скопје се најмладите меѓу 22-та починати од ковид-19 во изминатото деноноќие
Дваесет и седум годишно момче од Демир Капија е најмладиот меѓу починатите пациенти во изминатите 24 часа во земјава како последица од ковид-19, објави Министерството за здравство (МЗ).
Повеќе детали во дневните пресеци на МЗ за новозаболени лица, оздравени пациенти и смртни случаи од коронавирусот не се објавуваат. „Слободен печат“, сепак, дознава дека момчето имало хронични заболувања и оти, покрај коронавирусот, неофицијално боледувало и од церебрална парализа, иако таквата информација никој официјално не ја потврди, ниту, пак, дали смртта настапила во болнички или домашни услови.
Покрај 27 годишниот пациент од Демир Капија, во пописот на починати пациенти за изминатото деноноќие е запишан и 32-годишен маж од Скопје.
Вкупниот број на починати лица во последните 24 часа е 22, вирусот е детектиран кај 75 лица од направени 726 тестови, додека како оздравени се заведени 1.440 пациенти.