Молк од Тирана и Софија за иницијативата на Бујар Османи
Се уште нема одговор од Тирана или од Софија на предлогот на министерот за надворешни работи Бујар Османи, за политичко и економско продлабочување со Албанија и Бугарија преку т.н. „Иницијатива 8“. Според предлогот на МНР главната цел беше интензивирање на инвестициските проекти долж Коридор 8, односно од Црно до Јадранско море.
-По првичното запознавање на министрите за надворешни работи на Албанија и Бугарија со концептот на предложената трилатерална Иницијатива 8, министерот за надворешни работи на Северна Македонија, Бујар Османи, во периодот што претстои, ќе оствари средби со соодветните хомолози од двете земји, на кои една од главните теми ќе бидат и потенцијалите на Иницијативата. За таа цел, Османи ќе престојува во официјална посета на Тирана, каде ќе оствари средби со државниот врв на Република Албанија, информираат за „Слободен печат“ од Владата.
Османи претходно потенцира дека оваа иницијатива воопшто не е поврзана со разговорите за надминување на спорните прашања со Бугарија и откочување на евроинтегративниот процес за земјава. Дел од дипломатите, пак, оценија дека оваа иницијатива ќе претставува позитивен исчекор во понатамошниот тек на дипломатските активности за отпочнување на преговорите со Европската унија, бидејќи е добро што еден ваков предлог овојпат доаѓа од страна на Скопје.