Шефицата на европската дипломатија Федерика Могерини по презентација на извештајот на Европската Комисија за напредокот на земјите од Западен Балкан, изјави дека Европската Унија има многу инвестирано во Западен Балкан, а Северна Македонија и Албанија испорачале.

– Преспанскиот договор е импресивен, исто така и договорот со Бугарија. Тоа е нешто што ние го вреднуваме и препознаваме – изјави Могерини.

Таа додаде дека ЕУ ќе продолжи да ги поддржува земјите од Западен Балкан и дека сега топката е во комитетот на Советот на Европа која треба да даде зелено светло за почеток на преговорите со Албанија и Македонија.

На истата прес конференција, еврокомесарот за проширување, Јоханес Хан рече дека Македонија е единствена земја во регионот кој што нема никакво отворено прашање со соседите.

Дополнително, Хан предупреди за економските активности на кинеските компании во регионот на Западен Балкан и побара од земјите да го почитуваат правото на фер конкуренција за сите компании. Кина е споменета и во извештајот на Европската Комисија.