Македонскиот народен театар во чест на 61. роденден на „Охридско лето“ на 4 август на раководството на фестивалот им подари бронзена биста од Ана Липша-Тофовиќ. За роденден на фестивалот се смета денот кога оперската примадона Ана Липша-Тофовиќ во 1961 година го означи почетокот на „Охридско лето“. Бронзената биста на Ана Липша-Тофовиќ е дело на академик Димо Тодоровски, датирано во 1970 година, со наслов „Орфеј на Ана“.

– Во договор со синот на Ана Липша-Тофовиќ, МНТ излеа, според оригинална гипсена биста, три сигнирани копии во бронза од кои една е во сопственост на д-р Стефан Тофовиќ, една е дел од музејската поставка на МНТ, а една се предава на НУ „Охридско лето“.

Ликот на Орфеј во „Орфеј и Евридика“ на Кристоф Вилибалд Глук е желба на Ана Липша-Тофовиќ, која во 1950 година премиерно ја изведува во Операта при МНТ. Токму таа страст и големина на ликот скулпторот Тодоровски ја преточува во елегантна и суптилна форма, со задржана лиричност, строга поетичност на чувствата и голема симболика во преточувањето на ликот на Орфеј и можностите на Ана Липша-Тофовиќ – објаснува Ивана Јарчевска, раководителка на Музејот при МНТ.

(Текстот е објавен во „Културен печат“ број 92, во печатеното издание на „Слободен печат“ на 7-8 август 2021)