МНК ИКОМ: Музејска состојба на условна „пауза“
Одбележувањето на 18 мај – Меѓународниот ден на музеите годинава помина со честитка што Маја Чанкуловска-Михајловска, претседателка на Македонскиот национален комитет при Меѓународниот совет на музеите (МНК ИКОМ), ја упати до музејските професионалци. Годината почна со надежи за реализација на амбициозни локални и меѓународни проекти на МНК ИКОМ, но, согласно со неочекуваните и изменети услови на функционирањето на светот и животот во услови на пандемија во изминативе месеци, се сменија условите на функционирање на музеите и меѓународната музејска заедница и тие привремено се ставени во состојба на условна „пауза“.
– Честитката за овој, за нас најзначаен ден, оваа година ми е особено горчлива затоа што за првпат на неодредено време мораме да ги одложиме традиционалните советувања, средби, промоции, награди на музејските работници, кои изминативе години сѐ повеќе предизвикуваат интерес за присуство и стануваат енергетско средиште за размена на секојдневните искуства и поттик за надминување на тековните професионални музејски проблеми.
Сепак, и во вакви услови на изменето функционирање, доаѓа до израз основната мисија и значење на музеите како места во кои се собира, се чува, се заштитува и се презентира културното наследство и уметноста. Во состојба на изолација, страв и неизвесност, пак, се потенцира улогата на музеите како генератори на поврзаноста помеѓу луѓето и нивната колективна локална/ регионална/ меѓународна припадност преку културата и уметноста.
Така, активностите на музеите од „паузирани“ станаа дигитално проактивни, а работата на музејските професионалци стана поинаква. Различната работа насочена кон осмислување нови инвентивни начини за одржување на интересот на јавноста во период на затвореност за посети на изложбите и на колекциите, од своја страна, стана почва за отворање/осознавање различни перспективи на дигиталното функционирање на креативните платформи за интерактивна комуникација – истакна Чанкуловска-Михајловска.
Иако музеите постепено ги отвораат своите врати, сѐ уште со сигурност не се знае кога целосно ќе се нормализираат активностите во однос на физичката комуникација со публиката и колку видоизменето ќе биде отвореното и слободно функционирање.
(Текстот е објавен во „Културен печат“ број 32, во печатеното издание на „Слободен печат“ на 23-25 мај 2020)