Млад жител на Делчево затворен во домот поради неисправниот лифт, му помагаат соседите (ФОТО)
Во меѓувреме Далибор освен што не може да се симнува пред зградата е исправен и пред друг предизвик. Потребна му е операција, но заедно со неговата мајка не се во можност да ја обезбедат потребната сума.
Честиот дефект на лифтот во зградата во која живее на улица „Кеј на Брегалница”, му го отежнува животот на 31-годишното лице со попреченост, Далибор Станковски од Делчево. Слегувањето на улица без лифт и помош од другите, како што вели Далибор е невозможна, но често и неостварлива, бидејки не се наоѓаат често луѓе кои ќе го спуштат по скалите, за да излезе надвор од зградата.
-Лифтот веќе неколку дена не работи, поради што сум заглавен дома и не можам да излегувам. Често ми помагаат соседи, но некогаш нема никој дома, луѓето се на работа, така што сум принуден да седам дома. Кога пак има кој да ми помогне, количката симнувајки се скала по скала се оштетува, што ми претставува дополнителен проблем, вели Станковски.
За неработата на лифтот се пожалија и соседите, кои рекоа дека уредно плаќаат за негово одржување и тој треба да работи.
-Плаќаме по 300-400 денари, месечно. Јас однапред сум платила за половина година и заради тоа лифтот треба да работи. Тој најмногу му е потребен на Далибор, но ни е потребен и на сите нам, да си изнесеш дрва или да завршиш друга работа, вели сосетка на Далибор.
-Во лифтот често знае да се заглави третото копче за кое сме го известиле претседателот на куќниот совет. Доколку е поголем проблемот како што тврдат станарите, ќе испратиме наша екипа во понеделник или вторник да го поправиме дефектот, додадоа од фирмата одговорна за одржување на лифтот.