Мјанмар: Су Чи побара лично да се состане со адвокатите
Притворената лидерка на Мјанмар, Аунг Сан Су Чи, денеска побара од судот да и дозволи лично да се состане со нејзините адвокати кога се појави на онлајн сослушување за да се соочи со обвиненијата што ги поднесе воената хунта поради кои може да добие долгогодишна затворска казна.
Нејзините приврзаници ги повикаа граѓаните да го покажат своето спротивставување на пучот извршен на 1 февруари за време на традиционалниот новогодишен празник оваа недела во оваа претежно будистичка земја.
Су Чи (75), која со децении се бореше против воено владеење и доби Нобелова награда за мир во 1991 година, беше приведена по воениот удар во февруари и обвинета за разни злосторства, вклучувајќи кршење на тајни од колонијалниот период поради што може да добие 14 години затвор.
Таа е обвинета и за нелегално поседување воки-токи, кршење протоколи поврзани со коронавирусот и примање мито.
Неа и е дозволено со адвокатите да разговара само преку видео-врска во присуство на безбедносни службеници и не е познато дали воопшто знае за превирањата што ја зафатија земјата откако армијата ја презеде власта.
– Можевме да разговараме само за правни прашања, изјави нејзинaта адвокатка Мин Мин Со, прашан дали нејзиниот правен тим е во можност да разговара со неа за протестите во кои беа убиени повеќе од 700 луѓе.