Ракометарите на ПСЖ го совладаа Порто на гостински терен со 33:35 и така се задржаа на врвот на табелата во групата „А“ во ЕХФ Лигата на шампионите со 16 бодови од девет натпревари.

Македонскиот репрезентативен голман Никола Митревски за португалскиот клуб успеа да запише девет одбрани.

Кај неговите соиграчи најефикасен беше Итуриза со осум голови, а на спротивната страна за Французите девет погодоци беа дело на Шипжак.

Во истата група Магдебург со 36:34 пред своите навивачи беше подобар од ГОГ. Во генералниот пласман води ПСЖ со 16 бодови, пред Веспрем кој има 13, третопласиран е Магдебург со 12, девет има Динамо Букурешт, седум ГОГ, по пет Висла Плоцк и ППД Загреб, а последен е Порто со еден.

Во групата „Б“ Целје славеше над Елверум со 29:26, а Пик Сегед со 28:31 загуби од Кјелце.

На табелата лидер е Кјелце со 16 бодови, пред Барселона која има 15, Нант со 12 е третопласиран, следува Алборг со седум, по шест имаат Кил и Пик Сегед, претпоследен е Целје со четири, а на дното е Елверум со два.