Митревски: Сите да му дадеме поддршка на новиот стручен штаб
Голманот на Порто, Никола Митревски, ја доби улогата на прв голман на македонската репрезентација во претстојните квалификациски натпревари против Данска и од новиот селектор Кирил Лазаров.
За Митревски но и за останатите репрезентативци ова е ново искуство, но потенцира дека селекторот Лазаров и неговите помошници треба да добијат поддршка од сите ракометари.
– За сите нас ова искуство е ново, Лазаров и стручниот штаб мора да добијат поддршка од сите нас, да се обидеме што подобро се подготвиме за натпреварите со Данска. Секогаш има простор за напредок, без разлика колку екипата била лоша или добра. Ќе го чекаме мечот со Данска да видиме колку сме се подобриле од СП. Сè уште се комплетираме, денес почнаа да тренираат четворица, ни фали уште Пешевски. Добро се работи и се подготвуваме, сите сме желни да видиме што и како ќе прикажеме против Данска. Нема поголем мотив од тоа да се игра против светскиот шампион Данска. Многу ќе ни недостасува публиката, но знам дека ќе одиграме максимално. Мислам дека не треба премногу да земаме при срце и доколку доживееме неуспех, бидејќи имаме два меча против Швајцарија и Финска на кои влегуваме како фаворити и со максимален пристап потоа да го завериме пласманот на ЕП – вели Митревски.