Мистерија во Аргентина: 57 морнари се вратиле заразени со коронавирус, иако пред да испловат биле тестирани негативни
Аргентина се обидува да ја реши мистеријата за појава на Ковид-19 кај 57 морнари кои поминале 35 дена на море. Проблемот во ситуацијата е тоа што морнарите биле тестирани пред да пловат и резултатите биле негативни.
Сепак, рибарскиот брод „Ечизен Мару“ се вратил во пристаништето откако дел од морнарите развиле симптоми кои одговараат на коронавирусот, објави Министерството за здравство.
Според министерството, 57 од 61 член на екипажот сега се позитивни за коронавирус.
Сите биле тестирани 14 дена пред пловењето, биле негативни и биле во карантин во хотел во градот Ушуаја се додека не се качиле на бродот.
Само двајца морнари се негативни на вирусот, а резултатите се очекуваат за уште двајца членови на екипажот, додека двајца морнари биле хоспитализирани.
„Тешко е да се утврди како се заразиле бидејќи тие не биле во контакт со никого 35 дена и биле снабдувани со храна од пристаништето Усуаја“, вели епидемиологот Алехандра Алфаро од Тиера дел Фуего.
