Поранешниот македонски репрезентативец, Филип Миркуловски, не е оптимист во иднината на македонскиот ракомет.

Ракометарот кој остави неизбришлива трага во најголемите успеси на македонската репрезентација, смета дека по повлекувањето на Кире Лазаров, иднината воопшто нема да биде светла.

– Во последниот период слушнам многу приказни за светлата иднина, и дека и понатаму ќе се пласираме на Европските и на Светските првенства, но не верувам во тоа. Кога Кире Лазаров ќе се повлече, ќе ни биде тешко воопшто да се пласираме на големите натпреварувања. Ќе ни биде дури и потешко со новиот систем на квалификации за СП. Сите се надеваме на најдобро, но реалноста не е таква. Немаме ракометар кој веднаш би го заменил Лазаров на десен бек. Во следните три-четири години ќе мораме да се потпреме само на Талески и на Кузмановски и ќе ни бите исклучително тешко да се оствари позначаен резултат – изјави Миркуловски за „Балкан Хендбол“.

Миркуловски од 2015 година настапува за германскиот бундеслигаш Вецлар, а бидејќи се наоѓа на крајот од кариерата, во наредната сезона ќе настапува и како помошен тренер и како ракометар.