Ракометната репрезентација на Македонија со убедлив пораз од Данска (21:31) ги заврши настапите на Европското првенство. Ракометарите шансите за пласман во главната рунда ги пропуштија во натпреварите со Словенија и Црна Гора, а поразот од Данска беше очекуван поради проблемите со кои се соочи македонската репрезентација.

– Одигравме за наша душа, но сепак загубивме со 10 гола разлика. Иако одмараа неколку играчи, Данска е силна репрезентација, нивната втора, трета постава е подеднакво добра како и првата,  така да сметам дека тие се главен фаворит на ЕП.  Загубивме од најдобрата екипа – вели Филип Миркуловски.

Според големиот борец, причините за трите порази на ЕП може да се бараат во проблемите со повредите како и во коронавирусот.
– Да бидам искрен и ние играчите имавме големи очекувања од ова ЕП, се додека не се случија проблемите со коронавирусот и повредите. Се започна со повредата на Дејан Манасков, па на Никола Марковски за на крај и Кире Лазаров да се повреди на еден од последните тренинзи пред првиот натпревар. Се ќе беше поинаку доколку беа тие тука. Потоа се случија и проблемите со ковид-19. Не бевме кадарни да оствариме барем една победа на ова ЕП, видовме дека и Црна гора е силна селекција, денеска ја победија и Словенија. Доколку ме послужи здравјето, ќе бидам присутен за баражот – додава Миркуловски кој потврди дека ова е негова последна сезона како играч.

– Дефинитивно ова е моја последна сезона како играч, потоа ќе се посветам на тренерската кариера.