Миовски: Чест е да се биде дел од репрезентацијата, нема што да загубиме против Германија

Миовски синоќа дебитираше за сениорската репрезентација/ принтскрин/ФФМ

Напаѓачот на МТК, Бојан Миовски синоќа дебитираше во сениорската репрезентација на Македонија во победата над Лихтенштајн од 0:4.

Миовски влезе во игра во 61 минута на местото на Милан Ристовски, и имаше две шанси, но не успеа да се запише во листата на стрелци. Миовски е задоволен со дебитантскиот настап во сениорската репрезентација.

– Мислам дека рано го отворивме Лихтенштајн. Имавме неколку шанси кога топката не сакаше да влезе во голот. Знаевме дека по првиот гол ќе биде полесно. Имаме спој од младост и искусни фудбалери, кои ни помагаат во тек на натпреварите. Мислам дека имаме одлична репрезентација за иднина. Да се биде дел од националниот тим е гордост. Чест ми е што дебитирав за репрезентацијата и во иднина се надевам дека ќе ја оправдам довербата на тренерот – вели Миовски кој му се радува на натпреварот со Германија кој на 11. октомври ќе се игра во Скопје.

– Треба да останеме сконцентрирани и мислам дека секој фудбалер ужива да игра против Германија, нема што да загубиме. Да дадеме се од себе и треба да ги исполниме барањата на селекторот Благоја Милевски и мислам дека ќе избориме позитивен резултат. Мислам дека Германците се силна репрезентација, која нема да нѐ потцени. Тие се свесни за тоа што ги чека, а ние со помош на публиката ќе направиме да не им биде лесно во Скопје.

Видео на денот