Опозицијата продолжува со апелите пописот закажан за април да биде одложен. Од ВМРО-ДПМНЕ за „Слободен печат“ брифираат дека во најкус можен рок ќе ги повикаат граѓаните да им се придружат во иницијативата за собирање потписи за Закон за поништување на веќе изгласаниот Закон за попис.

Од партијата велат дека владејачката партија насилно го турка процесот на одржување на фалсификуван попис и побараа да се преброиме по електронски пат.

Според социјалдемократите, пак, само со вкрстување на податоците од електронските прашалници од терен со оние од базите на институциите ќе се добие целосна слика за населението и потенцираат дека физичката посета на домаќинствата ќе мора да се спроведе.

Но, одложување на пописот се бара и поради пандемијата предизивикана од корона вирусот. Од Министерството за здравство, за „Слободен печат“, велат дека заедно со Комисијата за заразни болести ќе бидат на располагање за едукација и донесување на посебни протоколи при спроведувањето на пописот, кој, според нив, е голем предизвик за време на пандемија.

-Процесот може да се спроведе и заврши по сите здравствени протоколи, без влошување на епидемиолошката состојба, каков што беше примерот со минатогодишните предвремени праламентарни избори. Консензусот на ниво на СЗО е дека ниту еден процес или постапка не треба да запре, туку треба да се спроведува со протоколи кои се универзално прифатени во сите земји, одговорија од Министерството, додавајќи дека се подготвени да им одржат и обука на попишувачите.

Претходно, директорот на Државниот завод за статистика, Апостол Симовски истакна дека максимално ќе се почитуваат постоечките протоколи, бидејќи, како што рече, самите попишувачи имаат семејства кои не сакаат да ги доведат во ризик. Тој дополни дека не очекува пандемијата да биде значаен фактор кој ќе влијае и на бројката на пријавени попишувачи на огласот кој наскоро ќе биде објавен.

Во меѓувреме, хрватските власти, токму поради епидемиолошката состојба, решија да го одложат спроведувањето на пописот на неколку месеци, а за да не го прекршат рокот од десет години без спроведен попис најавија дека тоа ќе го сторат најдоцна до март 2023 година.