Селекторот на фудбалската репрезентација на Македонија, Благоја Милевски е убеден дека неговите фудбалери по трите ремија во септемврискиот квлаификациски циклус за пласман на СП 2022 година, утре конечно ќе остварат победа.

Противник на фудбалерите е селекцијата на Лихтенштајн која на последниот меѓусебен дуел, во март годинава во Скопје беше совладана со убедливи 5:0.

– Може да кажам дека сум задоволен од тренинзите кои ги имавме изминативе денови, фокусот и залагањето на фудбалерите. Токму поради тоа убеден сум дека фаворитската улога од која не сакаме да избегаме ќе ја оправдаме и на утрешниот натпревар ќе дојдеме до победата. Иако, факт е дека ако сакаме три бода ќе биде неопходна максимална концентрација и ангажман на терен. Лихтенштајн на последните натпревари, како со Германија и Романија, а посебно со Ерменија покажа дека е селекција која е цврста, која има исклучително тактичка дисциплина. Станува збор за квалитетен тим и тоа го покажа, па сето ова ни наметнува дека треба да бидеме на највисокото ниво за да победиме. Јас ќе бидам задоволен со три бода, а за тоа ќе ни треба и многу концентрација и многу труд на теренот, за да бидеме на највисокото ниво и со најголем квалитет да се избориме за тие три бода – изјави Милевски на прес-конференцијата.