Мијалков ја тужи државата во Стразбур
Сашо Мијалков ја тужи Македонија пред Судот за човекови права во Стразбур, поради мерката притвор која му беше одредувана во 2018 и 2019 година, за случаите водени од СЈО: „Империја“, „Таргет-Тврдина“ и „Титаник 2“, пишува Фокус.
Во тужбата која ја поднел адвокатскиот тим на поранешниот директор на УБК, се наведуваат податоци за определувањето и за времетраењето на притворот за секој од предметите – се посочува дека во ноември 2018 година му бил одреден притвор за случајот „Империја“, поради ризик од бегство. На 1 декември притворот му бил укинат, но потоа му бил одреден нов, за случајот „Таргет и Тврдина“, исто така поради ризик од бегство.
Мијалков во тужбата го оспорува и притворот одреден по пресудата за случајот „Титаник 2“, односно тоа што Мијалков повторно бил вратен во истражниот затвор „Скопје“ на 8 март 2019 година, а Апелација му го заменила притворот со куќен притвор.
Адвокатите на Мијалков навеле дека притворот бил „незаконски, произволен и неразумен“.
Во тужбата исто така се поентира и дека во 2016 година, тогашниот претседател на државата Ѓорѓе Иванов донел одлука за помилување, со што Мијалков бил иземен од гонење за некои кривични дела. Потоа се појаснува и дека претседателот ја поништил дадената аболиција, за што се води посебна постапка пред европскиот суд.
Тужбата на Мијалков е примена во судот во Стразбур, кој испратил повеќе прашања до Министерството за правда, поради појаснување на наводите во тужбата, пишува Фокус.