Мицотакис во дилема за мерка против ковид-19: Самозаштита или карантин
Дилемата самозаштита или карантин ја постави грчкиот премиер Кирјакос Мицотакис во неговата нова телевизиска порака до граѓаните во која говореше за ситуацијата со коронавиусот во Грција, за потребата од почитување на мерките, ставајќи акцент на употребата на маска, за индивидуалната одговорност, но не не соопшти дополнителни рестриктивни мерки.
– Ќе кажам отворено. Дилемата е самозаштита или карантин. И знаејќи ги последиците од вторто, должни сме да го избереме првото. Без многу зборови, но со малку постапки, проверени и ефективни: дистанца, лична хигиена, а особено маска, додека да се најде лек и вакцина. Секако, би се осмелил да кажам дека маската е вакцина, додека да дојде вакцината, порача Мицотакис.
Објасни дека во справувањето со новиот бран на пандемијата „потребна е уште потесна соработка со уште поголема меѓусебна доверба на државата, на научниците и на граѓаните” и додаде дека земјата е поподготвена од претходно, бидејќи познато е кои мерки носат резултат, но истакна дека дури и најефективната мерка „зависи од доследото спроведување”.
– Или повторно заедно ќе успееме или заедно ќе ја загубиме шансата, истакна грчкиот премиер.
Додаде дека наредните недели ќе бидат одлучувачки за наредните месеци, а можеби и години.
– Поминавме седум тешки месеци. Владата истовремено се бори на многу фронтови: националните прашања, мигрантското прашање, економијата, но и природните катастрофи. Но, особено во војната за здравјето, како никаде на друго место, свесниот граѓанин ни е потребен за сојузник, рече грчкиот премиер.
Во речиси десет минутната порака до граѓаните, Мицотакис говореше и за здравствениот систем. Притоа истакна дека е зголемен бројот на кревети на Одделенијата за интензивна нега од 557 на речиси 1.000, вработени се околу 6.200 нови болничари и лекари, зголемен е дневниот број на тестови и сл.
Во Грција денеска се регистрирани 342 нови случаја на ковид-19, а починаа девет лица. Од почетокот на епидемијата во земјата се регистрирани 16.627 заболени од коронавирусот, а починаа 366 лица.