Таканаречената иницијатива на мал број на луѓе заробеници и слуги на Зоран Заев, практично се обидуваат да манипулираат со дел од делегатите кои беа присутни и на конгресот во Куманово, а потоа и во Валандово, кажа Мицкоски при одговор на новинарско прашање во однос на иницијативата за вонреден Конгрес.

Мицкоски истакна дека истите тие имаат единствена цел – да добијат милост од нивниот стопан Зоран Заев за да може да се спасат од определен политички и кривичен прогон што се случува.

Лидерот на опозициската партија рече дека Централниот Комитет на синоќешната седница закажа Конгрес на ВМРО-ДПМНЕ за крајот на месец ноември. Тој ќе биде редовен конгрес што се одржува на секои четири години и на него ќе се разговара за идните чекори што идното раководство на партијата ќе ги преземе.

Мицкоски ја искористи приликата и да се заблагодари на сите членови на партијата, поранешни функционери, активисти кои ги препознаваат овие криминални обиди на дел од поранешното раководство на партијата и со гадење ги отфрлаат истите и продолжуваат заедно со раководството на партијата легитимно да се борат до остварување на крајната цел.

– Крајната цел е ослободување на македонскиот народ, на македонските граѓани, на Македонија од овој хибриден режим што го предводи владата на Зоран Заев и СДСМ. Јас сум го одел мојот пат, мојот пат е да служам на Македонија, на македонскиот народ и на организацијата, а тие од одбрале нивниот пат да му слугуваат на Зоран Заев. Режимот ќе падне, а со него ќе падне и Зоран Заев, а потоа следи одговорност за сите оние криминалци кои се обидуваат да и наштетат на Македонија, рече Мицкоски.