Мицкоски: Нашиот предлог е градба на клинички центар – трипати поевтин и пофункционален
Проектот клинички центар не постои. Зошто велам дека не постои? Пред мене ја имам физибилити студијата изработена во 2019 година и има цели 35 страни и врз основа на оваа физибилити студија граѓаните треба да платат ни помалку, ни повеќе – 508 милиони евра. Тука не се внесени дополнителните трошоци кои се однесуваат на пристапни патишта, енергетско напојување, гасоводна инфраструктура, вода, канализација, имотно правни односи итн. И така овој проект може лесно да дојде до 550-600 милиони евра. Кога видовме дека станува збор за несериозен пристап, врз основа на податоци од 2009 година кога воопшто пандемија со ковид немаше. После ковидот пристапот генерално во здравството е сменет, рече Мицкоски во своето гостување во Дневникот на МРТ.
Тој информираше дека неговата партија дала идеен проект и укажа дека треба да се искористат податоците од Банката за инвестиции на Европа врз основа на што е добиен кредит за изградба на клинички во 2016 -2017 година кој е и поевтин 4-5 пати.
– Оттука го предложивме платото кое се наоѓа помеѓу поранешна Воена болница, сегашна 8 септември и Румунска и каде ќе изградиме нова зграда за да ги поврземе овие објекти. Зошто? Затоа што ова место има инфраструктура, има пристап од три булевари – 8 септември, Илинденска и Партизанска и ова е предложено на тет-а тет средбата со Заев, но до овој момент нема ништо, кажа Мицкоски.
Мицкоски укажа дека ВМРО-ДПМНЕ не е против нов клинички, туку e против тоа „да ѝ се дадат на оваа корумпирана Влада пари на граѓаните и тоа 508 милиони евра за да прави нешто нереално“.
– Додека јас сум претседател на ВМРО-ДПМНЕ, тоа нема да го поддржам. Но, ќе поддржам изградба на клинички центар кој ќе биде пофункционлен и најмалку трипати поевтин, кој ќе биде врвно издание во Европа. Тоа е она за што се залага ВМРО-ДПМНЕ, ама треба да има проект, затоа што за оваа физбилити студија за која беше одобрен и кредит од Европска развојна банка е зошто четири години не се мрдна е друга работа. Од друга страна, ни поттурнуваат неколку листа хартија, податоци од 2009 година и се направено пред пандемија. Значи, да заклучам, да за клинички, ама не за 50 милиони евра за најкорумпираната влада во Европа, рече Мицкоски.