Мицкоски, Села и Гаши ја официјализираа предизборната коалиција
Македонскиот и албанскиот опозициски блок предводен од опозициските лидери Христијан Мицкоски, Зиjадин Села и Африм Гаши веќе подолг период го најавуваше предизборното коалицирање на претстојните локални избори.
Денес во Собранието на Република Северна Македонија тројцата лидери го официјализираа предизборното коалицирање. Тие меѓусебно ќе ги поддржат кандидатите за градоначалницци во некои општини низ земјава.
„Соработката подразбира дека споменатите партии нема да кандидираат градоначалници во одредени општини и ќе се поддржуваат меѓусебно, а во други општини ќе се натпреваруваат со сите други партии. Станува неминовна опозициската соработка, со цел единиците на локалната самоуправа да бидат ослободени од корупциското владеење, од нетранспарентното трошење на пари и од злоупотреба на власта на СДСМ и ДУИ на сите нивоа на државната управа”, стои во заедничкото соопштение на ВМРО-ДПМНЕ, АА-А.
Ова е прва предизборна соработка на ВМРО-ДПМНЕ со албанските партии.
Лидерот на ВМРО-ДПМНЕ Христијан Мицкоски во објава на Твитер нагласува дека новата коалиција ќе придонесе против корупцијата и за силен развој на општините.
Договор за соработка на ВМРО-ДПМНЕ, Алијанса и Алтернатива против корупцијата и за силен развој на општините.
Одиме на победа! pic.twitter.com/0iyHzszJVk
— Христијан Мицкоски (@MickoskiHM) August 27, 2021
СДСМ најави дека ќе ги поддржи кандидатите на владините коалициски партнери некаде во првиот, а некаде во вториот круг, додека пак ДУИ рече дека соработката со СДСМ ќе се реализира само во вториот круг.
