Од утре продолжуваат консултациите за референдумот со коалициските партнери, да видиме кој е нивниот став. Многу скоро ќе излеземе со конкретна позиција, рече денеска претседателот на опозициската ВМРО-ДПМНЕ, Христијан Мицкоски.

– Внатрепартиската дебата ќе продолжи утре, во вторник, среда, така што многу скоро од денеска ќе имаме позиција. Нема што повеќе да додадам освен да го завршиме процесот и да излеземе со конечен став пред граѓаните, дали ќе одиме со 150.000 потписи или со пратениците, имајќи предвид дека континуирано се сее притисок од власта дека некој се двоумел, а не сакаме да ги изложуваме толку граѓаните пред оваа хибридна и режимска власт, па може ќе се одлучиме да одиме со 44 пратеници од ВМРО-ДПМНЕ да го поднесеат референдумот – изјави Мицкоски во Љубанци по пуштањето во употреба на ново спортско игралиште.

ВМРО-ДПМНЕ сака со референдум да го поништи европскиот предлог со кој Македонија ги отвори преговорите за членство со ЕУ, затоа што го смета за штетен за националните интереси бидејќи е во корист на Бугарија и со него се врши бугаризација на напата земја. Не се познати детаљи за референдумското прашање, што конкретно од европскиот пакет-документи ќе биде оспорено и дали тоа ќе се однесува само на преговарачката рамка. Познато е само дека на референдумот нема да се оспорува условот за внес на Бугарите во Уставот, затоа што ВМРО-ДПМНЕ вели дека нивните пратеници се гаранција дека власта нема да го има потребното двотретинско мнозинство.