Фудбалерите на Аргентина ја совладаа Австралија со 2:1 и со тоа се пласираа во четвртфиналето на Светското првенство во Катар каде за противник ќе ја имаат репрезентацијата на Холандија.

Лионел Меси против „Кенгурите“ го одигра својот 1000 јубилеен меч во кариерата, а постигна и гол, прв во нокаут фазата на светските првенства. Тој беше задоволен на крајот од средбата.

– Можевме и порано да го завршиме натпреварот, тие дадоа гол по пеналот и почнаа да нè притискаат. Освен онаа ситуација кон крајот, кога нашиот голман одбрани, не паднавме многу – изјави Меси.

Тој призна дека не било лесно со Австралијците.

– Продолживме понатаму и тоа е најважно. Беше напорен ден, имавме многу малку време за одмор. Тоа беше физички многу напорен натпревар. Среќен сум што направивме уште еден чекор кон остварување на нашата цел – вели играчот на ПСЖ.

На Аргентинците сега им претстои дуел со Холандија, а победникот ќе оди во полуфиналето.

– Нашиот тим е импресивен. Кога рекоа да играме на секои три дена, рековме дека е лудост, но нашата желба беше да се најдеме на оваа позиција, бидејќи сите знаат какво е чувството да се игра на Светското првенство. Останавме обединети, сега ни претстои уште еден тежок натпревар, со Холандија – заврши Меси.