Реал Мадрид им ја презеде титулата во Ла Лига, а по отказот на Ернесто Валверде и доаѓањето на Кике Сетиен за нов тренер, се распадна и играта на каталонците. Последна шанса да се спаси сезоната е Лигата на шампионите.

Според шпанските медиуми, Меси по натпреварот со Алавес кој им беше последен во ЛШ ги собрал сите спротивтавени страни во клубот, фудбалерите, тренерот но и управата на чело со претседателот Хосеп Мариа Бертомеу и директорот Ерик Абидал и им наредил да се закопаат воените секири и сите да се сконцентрираат на Лигата на шампионите.

Меси ги стави на страна несогласувањата со Сетиен, но и со директорот Абидал, а притоа на Сетиен му го претставил планот: да се освои трофејот во ЛШ или тренерот нема потреба да се враќа во Барселона.
Ѕвездата на Барселона не сакаше да го потврди состанокот, но за медиумите ја прокоментира сезоната.

– Сезоната не заврши како што очекувавме. Бевме слаби, и екипа со малку поголем интузијазам и волја можеше да не победи. Расфрлавме бодови каде ќе стигневме и игравме лоши, неубедливо и со многу падови. Мораме да бидеме самокритични, прво ние играчите, а потоа и сите други во клубот. Ние сме Барселона и мораме секого да победиме – изјави Меси.

Барселона во продолжението од Лигата на шампионите ја очекува реванш осминафиналниот натпревар против Наполи (1:1) на „Камп Ноу“, а доколку ги елиминира италијанците ќе игра во завршницата која ќе се одржи во Лисабон.