Германската канцеларка Ангела Меркел го повика британскиот премиер Борис Џонсон да ги продолжи преговорите за односите со Европската Унија (ЕУ) по Брегзит. Таа потенцира дека е неопходен компромис, пишува „Гардијан”.

Барањето на Меркел доаѓа во момент кога се чека изјава од Џонсон за тоа дали британската страна ќе се повлече од преговорите. Меркел се обиде да ги смири страстите и истакна дека двете страни мора да најдат заеднички јазик.

Во септември Џонсон се закани дека Лондон ќе се повлече од разговорите доколку до овој викенд не се постигне договор.

– На некои места работите се одвиваат добро, на други места треба уште многу да се сработи. Побаравме од Велика Британија да остане отворена за компромис за да може да се постигне договор. Тоа значи дека и ние, исто така, мора да правиме компромиси, забележа германската канцеларка.