Меркел по самитот на Г-7: Богатите земји треба да обезбедат вакцини за посиромашните
Германија и другите богати земји треба покрај парична помош, да донираат и дел од своите залихи на вакцини за сиромашните земји, бидејќи пандемијата можеме да ја завршиме само ако ги вакцинираме сите луѓе на Земјата, порача денеска германската канцеларка Ангела Меркел после самитот на Г-7.
Таа додаде дека не се разговарало колку проценти од државните залихи треба да се донираат.
„Нагласив дека пандемијата нема да биде завршена додека не се вакцинираат сите граѓани на светот“, рекла канцеларката Меркел, пренесува Ројтерс.
Таа укажала дека новиот претседател на САД, Џо Бајден веќе ја зајакнал меѓународната соработка и мултилатерализмот, а коментирајќи ги дипломатските активности по повод оживување на иранскиот нуклеарен договор најавила дека ќе проба да пружи поддршка на преговорите.
„Мораме пред се да се погрижиме да не влеземе во проблем околу тоа кој би требало да го направи првиот чекор“, предупредила Меркел.